Në 24-vjetorin e rënies së dëshmorit nga Rahovecit, Gëzim Hamza – Piktori, kryetari i Rahovecit Smajl Latifi ka çmuar lartë figurën e tij, duke thënë se ai jeton në veprën madhështore që e shkroi me gjatë.
Me poshte ju sjellim postimin e tij te plote:
24 vjet pas rënies në detyrë luftarake
Dëshmori i atdheut Gëzim Hamza-PIKTORI, jeton me veprën madhështore që e shkroi me gjak, sa të ketë jetë në truallin dhe nënqiellin shqiptar. Ai është i gjallë ndër breza, për porositë që na i la për së gjalli kur po luftonte me shpirt ndër dhëmbë me plagët e rënda të lirisë, që për pasojë të tyre, ai fitoi pavdekësinë, për të mbetur i gjallë përjetësisht në kujtesën e popullit tonë, si një emër i ndritur i luftës për çlirimin e Kosovës.
Gjaku i derdhur i bashkëluftëtarëve në luftimet e korrikut 1998 në Rahovec, është gjak i kuq lirie. Lufta për mbrojtjen e Rahovecit, bashkoi luftëtarë nga Rahoveci, Malisheva, Suhareka, nga Drenica e Dukagjini. Luftimet ishin të ashpra, heroike dhe të përgjakshme.
Vërtet, në këto luftime humbëm shumë bashkëluftëtarë trima të sprovuar në beteja e qytetarë të paarmatosur, por pesha dhe roli i UÇK-së dhe lufta jonë kundër pushtuesit ishte e gjallë, rezistenca jonë ishte e fortë dhe rruga e lirisë kërkonte nga ne çmimin e lartë të gjakut.
Epopeja e UÇK-së në Rahovec, në ato ditë të nxehta korriku, u shkrua me gjak, me shembuj heroizmi e përkushtimi të UÇK-së e shqiptarëve liridashës, atyre që ia kthyen gjoksin furtunës, për ta ndalur, për ta goditur e për ta përzënë nga ky truall pushtuesin barbar serb.
Nderim dhe lavdi të përjetshme ‘PIKTORIT’!
